Lettre à Maurice Lippens

texte original français complet


Binamé Maurice,

Nos estans bén disbåtchîs d’ ôre ki vos alez prinde vosse pinsion. Mins, djans ! Vos l’ avoz bén wangnî.
Ké planete, valet, ki vos avoz la yeu ! Après l’ ULB (doctorat e droet), vos avoz fwait li Scole des Afwaires di Harvard. Adon-pwis, vos avoz todi yeu çou ki vos djéryîz après : des liårds, bråmint des liårds.
Tot s’ vinant ashir ås Consey d’ Administråcion di Belgacom, Finasure, GBL, Suez-Tractebel, Total, eyet pol tchesseute, Fortis, ki vos avoz cåzu metou so s’ cou.
Mins çoula, nos ndè rcåzrans.

Vos soçons vos ont bén préjhî [F: prisé, apprécié]: Vos fourîz meyeu manaedjeu d’ l’ anêye e 1994, meyeu eterprindeu bedje e 1996, et hay vos nd åroz. Cwantes côps n’ vos a-t on nén rindou rindou bon dvwer !
On-z a ricnoxhou vos vraiyès cwålités : li rapiasté eyet l’ dår di todi wangnî dipus d’ çanses.
Vos årîz touwé on pû po-z aveur si pea, dijheut on.

Rapiasse, crantchou, vos l’ estîz, ådla !
Lanawairevos cousses del FEB (Federåcion des Eterprijhes di Beldjike) estént ki critiként tofer les trop hôts salåres des patrons, å posse et dins les gazetes.
So ç’ tins la, vos, franc come on tigneu, vos vos rhåssîz d’ on plin côp di 75 % ! On m’ a ddja dit ki dj’ esteu pår èn afronté. Mins vos, vos l’ estoz co cint côps d’ pus k’ mi, vormint.
Mins, gn a nole si claire aiwe ki n’ si brouye. Ci côp cial, avou vosse Fortis, vos avoz prins boû po vatche. Totafwaitmint !

Vos avoz furlé des miyårds a målvåt. Malén come on vexhåd, c’ est nén avou vos cwårs ki vos avoz djouwé : c’ est avou les cis des ptitès djins ki vos avént vudî leus ptits sôs po leu pinsion.
Vos av’ djouwé a des djeus d’ tirlibibi dins les boûsses ; vos avoz ratchté des ôtes bankes po poleur fé li lwè vos tot seu.
Mins li ci ki raetche e l’ air, li raetchon lyi rtchait cobén e plin vizaedje.

Ki : les cis k’ î ont leyî leus hozetes, c’ est les ptits accionaires et les pinsionés. Vos, vos n’ avoz nén a conter vos çanses. (Å resse, savoz bén çou k’ c ‘ est ene çanse ?). Vos ploz co lonmint viker so blanc poes. Li cou dins l’ boure. Vos n’ ploz må di n’ saveur payî vosse facteure a Electrabel, u a manker d’ brokes cwand vos alez ås comissions. Biesse ki dj’ so : vos n’ alez nén fé vos coûsses, vos : vos magnîz å restorant !

C’ est nén vos ki va bénrade toutchî 650 uros par moes come pinsion, come des cints meyes di Bedjes, divant waire : Vos n’ estoz nén l’ fi d’ vosse pa (18inme fortune do payis) po rén. Li diale tcheye todi so les pus gros monceas !
Tot conté, tot rabatou, i våt mî ki vos prindîxhe vosse pinsion, asteure ki vos avoz fwait berwete avou Fortis.

Nozôtes, les ptits payeus d’ contribucions, on-z a erité d’ ene nouzome desse. Mins i nos dmeure co nos ouys po tchoûler.
Va s’ ti rpoizer, dabôrd, måssî veråt ! T’ as fwait ene boune djournêye.
Vas s’ lére li Finantial Times a Knoke ; va s’ foumer tes gros cigåres å Ceke di Lorinne avou tes plankets ! Va s’ ås zivercôfes !Va s’ ås cwate cints diales, djans !

Cwand t’ î arivrès podbon, e l’ infier, i serè co tins assez po tuzer et ratuzer a tos les djins ki t’ elzî as distrût leu spågne-måle [tirelire]. Et les miyons d’ ôtes ki, po des ans et des razans, ni såront pus rexhe leu tiesse foû des strins. Dji n’ djåze nén ddja des pratikes da Fortis, mins des candes d’ Electrabel ki n’ savnut ddja pus payî leu moes.

Et dji m’ rastén co, cwand dji di çoula. Ca dji pôreu co cåzer di t’ societé Total ki mannit nosse Daegne. Et on djoû, nos efants et ptits-efants el payront tchir et vilin.
Mins dji di çoula et dji n’ di rén. Ti t’ è cayes, di mes råtchåds. « Après nozôtes, les moxhes ! » C’ est çoula k’ ti does pinser, va, dandjreus !

Dabôrd, binamé Maurice, dji vos è sere cénk ! Et ene boune pougneye a tos vos frés biyteus. Et lzî dire ki si nos estans sol minme Bleuwe Bole, nos n’ estans nén do minme monde.